Naumt tap hjá Kristianstad fyrir meisturunum

Kristianstad tapaði 0-1 á heimavelli fyrir sænsku meisturunum í Umeå í sænsku úrvalsdeildinni í dag. Allar íslensku stelpurnar þrjár voru í byrjunarliðinu.

Lærisveinar Elísabetar Gunnarsdóttur í Kristianstad er enn án stiga í sænsku úrvalsdeildinni eftir töp í fyrstu tveimur umferðunum. Liðið situr við hlið Sunnanå SK í neðsta sætinu en liðið á enn eftir að skora sitt fyrsta mark á tímabilinu.

Allir þrír íslensku leikmenn Kristianstad voru í byrjunarliðinu annan leikinn í röð. Guðný Björk Óðinsdóttir og Erla Steina Arnardóttir spiluðu allan leikinn en Hólmfríður Magnúsdóttir fór útaf á 61. mínútu.

Sigurmark Umeå kom á 84. mínútu leiksins og það skoraði Sofia Jacobsson. Umeå er búið að vinna tvo fyrstu leiki sína en Djurgården og Kopparbergs/ Göteborg eru einnig með fullt hús. Næsti leikur Kristianstad er á móti Djurgården.