Tiltekt hjá Tékkum

Nóg hefur verið að gera á skrifstofu tékkneska knattspyrnusambandsins í dag. Sambandið hefur rekið landsliðsþjálfarann Petr Rada og sett sex leikmenn í bann vegna agabrota.

Rada leysti Karel Brueckner af hólmi sem landsliðsþjálfari á síðasta ári, en hefur nú verið látinn fara þar sem árangur liðsins þykir ekki samræmast væntingar sambandsins.

Tékkar eru í fjórða sæti þriðja riðils í undankeppni HM með átta stig eftir sex leiki og eru tæpir með að ná á HM næsta sumar.

Þá voru framherjarnir Milan Baros, Martin Fenin og Vaclav Sverkos, miðjumennirnir Radoslav Kovac og Marek Matejovsky og varnarmaðurinn Tomas Ujfalusi allir dæmdir í bann fyrir agabrot.

Ujfalusi, sem leikur með Atletico Madrid á Spáni, hefur lýst því yfir að hann sé hættur að leika með landsliðinu.

Myndir náðust af Ujfalusi og félögum hans þar sem þeir voru seint úti á lífinu eftir tapleik gegn Slóvakíu í síðustu viku og hefur fyrirliðinn verið gagnrýndur harðlega í kjölfarið.