Ronaldo svarar ásökunum Larsson

Cristiano Ronaldo, leikmaður portúgalska landsliðsins, hefur svarað ásökunum Svíans Henrik Larsson fyrir leik liðanna í undankeppni HM 2010 í kvöld.

Larsson sagði Ronaldo sérstaklega duglegan að láta sig detta í leikjum og hvatti landa sína til að gera slíkt hið sama í leiknum gegn Portúgal í kvöld.

„Mér er alveg sama hvað Larsson segir því ég veit að ég læt mig ekki detta og það er það eina sem skiptir máli," sagði Ronaldo í samtali við Daily Mail í Englandi.

„Andstæðingarnir eru duglegir að sparka mig niður en ég læt mig ekki detta. Svo virðist sem margir vilja meina að ég stundi það mikið en mér er alveg sama um það. Ég veit að ég er sanngjarn í því sem ég geri."