Ætla ekki að eyðileggja tölfræðina hans Drillo

Norska fótboltalandsliðið hefur ekki tapað heimaleik undir stjórn Egil „Drillo" Olsen síðan árið 1991. Alls hefur liðið spilað 29 heimaleiki í röð án þess að tapa með hann í brúnni og sá þrítugasti gæti komið í kvöld þegar Norðmenn taka á móti Finnum í vináttulandsleik.

„Þetta verður sérstakt því hann er með frábæra tölfræði hér. Við höfum engan áhuga á að verða þeir sem eyðileggja þessa tölfræði fyrir honum. Við ætlum að gera allt í okkar valdi til þess að ná góðum úrslitum úr þessum leik," sagði John Arne Riise við vefsiðu Dagblaðsins í Noregi.

það eru liðnir 4123 dagar síðan að Egil „Drillo" Olsen stjórnaði norska landsliðinu síðast á Ullevaal-vellinum en liðið gerði þá markalaust jafnteflið við Kólumbíu. Síðustu tveir heimaleikirnir undir hans stjórn árið 1998 fóru fram í Molde og á Bislett-vellinum.

Alls hefur norska landsliðið unnið 19 leiki og gert 10 jafntefli síðan að liðið tapaði síðast undir stjórn Drillo á heimavelli. Það tap var gegn Tékkum 25. september 1991.

Síðustu 29 heimaleikir Norðmanna undir stjórn Egil „Drillo" Olsen:

1992:

Færeyjar 2-0

Skotland 0-0

Svíþjóð 2-2

San Maríno 10-0

Holland 2-1

1993:

Tyrkland 3-1

England 2-0

Bandaríkin 1-0

Pólland 1-0

1994:

Portúgal 0-0

Danmörk 2-1

Hvíta-Rússland 1-0

Holland 1-1

1995:

Lúxembourg 5-0

Ghana 3-2

Malta 2-0

Frakkland 0-0

Tékkland 1-1

England 0-0

1996:

Spánn 0-0

Aserbaíjdsjan 5-0

Georgía 1-0

Ungverjaland 3-0

1997:

Finnland 1-1

Brasilía 4-2

Sviss 5-0

Kólumbía 0-0

1998:

Mexíkó 5-2 (Bislett)

Sádí-Arabía 6-0 (Molde)