Terry tryggði Englendingum sigur á Úkraínumönnum

Varnarjaxlinn John Terry var hetja Englendinga í kvöld þegar hann tryggði liðinu 2-1 sigur á Úkraínumönnum í undankeppni HM. Enska liðið hefur þar með 100% árangur undir stjórn Fabio Capello í undankeppninni og er komið með annan fótinn á HM á næsta ári.

Enska liðið hefur unnið alla fimm leiki sína í keppninni til þessa, en sá síðasti var nokkuð naumur. Peter Crouch kom enska liðinu yfir á 29. mínútu og réttlætti þar með að veru sína í enska landsliðinu enn eina ferðina.

Andriy Shevchenko reimaði á sig skotskóna og jafnaði fyrir gestina þegar sextán mínútur lifðu leiks, en það var svo Terry sem tryggði enskum sigurinn þegar hann mokaði boltanum í markið af stuttu færi þegar um fimm mínútur lifðu leiks.