Beckham stoltur af metinu

David Beckham bætti í gær met Bobby Moore er hann lék sinn 109. landsleik á ferlinum. Enginn útileikmaður hefur leikið fleiri leiki með enska landsliðinu.

Metið á markvörðurinn Peter Shilton sem lék alls 125 leiki með enska landsliðinu. Ef vel gengur hjá enska landsliðinu og Beckham heldur áfram að spila með enska landsliðinu alveg fram til HM 2010 gæti hann jafnvel náð árangri Shilton.

„Þetta er mjög sérstakt tilefni fyrir mig persónulega að ná þessum fjölda landsleikja og bæta met Bobby Moore," sagði Beckham í samtali við enska fjölmiðla eftir leik. „Ég er mjög stoltur af því. En það mikilvæga er hvernig við stóðum okkur í leiknum," bætti hann við.

England vann í gær 4-0 sigur á Slóvakíu er liðin mættust í vináttulandsleik á Wembley-leikvanginum.

„Þetta var góður dagur fyrir mig en enn betri dagur fyrir liðið," sagði Beckham sem hélt upp á áfangann með því að leggja upp annað mark leiksins fyrir Wayne Rooney.