Ísland í öðru sæti

Ísland skaust upp í annað sæti 9. riðils í undankeppni HM 2010 þó svo að liðið hafi ekki spilað í gær.

Aðeins einn leikur var í riðlinum í gær. Holland vann 3-0 sigur á Skotlandi og tóku þar með átta stiga forystu á toppi riðilsins.

Ísland og Skotland eru bæði með fjögur stig en eftir leik gærdagsins eru Skotar með lakari markatölu en Íslendingar. Ísland hefur skorað fjögur mörk og fengið sex á sig en Skotar hafa skorað tvö og fengið fimm á sig.

Bæði mörk Skota til þessa í riðlinum komu á Laugardalsvellinum nú í haust.

Skotar eru þó aðeins búnir með einn heimaleik í riðlinum en í honum gerðu þeir markalaust jafntefli við Norðmenn. Skotar taka á móti Íslendingum í Glasgow nú á miðvikudaginn og er óhætt að segja að leikurinn sé gríðarlega mikilvægur fyrir báða aðila.

Efsta liðið kemst beint á HM í Suður-Afríku. Alls eru níu Evrópuriðlar í undankeppninni og þau átta lið sem ná bestum árangri í öðru sæti síns riðils komast í umspil.

Sem stendur er Ísland með lakasta árangurinn af þeim liðum sem eru í öðru sæti sinna riðla.