Farbann á fyrrverandi stjórnarformann Byrs

Jón Þorsteinn Jónsson, fyrrverandi stjórnarformaður Byrs, sætir nú farbanni vegna rannsóknar sérstaks saksóknara á málefnum Byrs og eignarhalds­félagsins Exeter. Er hann eini maðurinn sem til þessa hefur verið úrskurðaður í farbann vegna rannsókna embættisins.

Samkvæmt heimildum Fréttablaðsins þótti rík ástæða til að tryggja viðveru Jóns Þorsteins hér á landi í kjölfar húsleita sem gerðar voru hjá Byr og MP Banka í nóvemberlok, ekki síst í ljósi þess að hann hefði nýlega flutt lögheimili sitt til London og væri því líklegur til að fara úr landi.

Fulltrúar sérstaks saksóknara sátu fyrir Jóni Þorsteini morguninn sem húsleitirnar fóru fram og handtóku hann, eins og aðra grunaða í málinu. Jóni Þorsteini var haldið í yfirheyrslum lengst allra, í nálega sólarhring, áður en honum var sleppt á ný.

Heimildir blaðsins herma að farbannið renni út eftir helgi og ekki liggur fyrir hvort óskað verður eftir framlengingu á því.

Rannsóknin snýst um kaup Exeter á stofnfjárbréfum í Byr fyrir um milljarð króna í október og desember í fyrra. Bréfin voru keypt meðal annars af Jóni Þorsteini og MP Banka. Byr lánaði móðurfélagi Exeter fyrir kaupunum. Grunur er um umboðssvik, auk annarra brota á auðgunarbrotakafla hegningarlaga. Slík brot varða allt að sex ára fangelsisvist.

Exeter keypti einnig bréf af öðrum stjórnarmanni Byrs, Birgi Ómari Haraldssyni, sem líka er grunaður í málinu. Jón og Birgir höfðu báðir tekið lán hjá MP Banka fyrir kaupunum á stofnfjárbréfunum. Með sölunni til Exeter sluppu þeir við mögulegt gjaldþrot, ef gengið hefði verið að þeim vegna skuldanna. Eignarhald Exeter er óljóst. Þannig hafa nokkrir stofnfjárhafar í Byr fullyrt að MP Banki eigi félagið, en því hafa forsvarsmenn MP Banka neitað.

Greint var frá því í fréttum í lok mars síðastliðins að Fjármálaeftirlitið hefði hafið rannsókn á viðskiptunum. Fyrr í mánuðinum lét Jón Þorsteinn af stjórnarformennsku í Byr, að eigin sögn vegna þess að félög honum tengd áttu þá í samningaviðræðum við lánardrottna.

stigur@frettabladid.is