Klitschko mætir Haye í sumar

Næsti bardagi heimsmeistarans Vladimir Klitschko verður gegn Bretanum David Haye í London í sumar. Þetta tilkynnti Úkraínumaðurinn í dag.

Klitschko stefnir á að bardaginn fari fram þann 20. júní og vonast til að halda hann á Stamford Bridge, heimavelli knattspyrnuliðsins Chelsea.

Haye verður 29 ára gamall á árinu og hefur gefið út drjúgar yfirlýsingar um hvað hann ætli að gera við heimsmeistarann.

"Ég hef áður mætt mönnum sem ætluðu að halda jarðarför mína í hringnum, en hann má tala eins og hann vill. Ég mun svara honum í hringnum. Hann á ekki von á góðu," sagði Klitschko.

Eldri bróðir Vladimir Klitschko, Vitaly, mun berjast næst þann 21. mars í Stuttgart í Þýskalandi þar sem hann mætir Kúbverjanum Juan Carlos Gomes.

Vitaly hefur ekki gefið upp alla von um að fá Lennox Lewis til að taka hanskana fram að nýju.

"Fyrst lýsti hann því yfir að hann væri hættur en nú er hann hættur að segja nokkuð þegar hann er spurður út í mögulega endurkomu. Ég held að þetta sé bara spurning um peninga," sagði Vitaly.