Indriði: Ekkert kom okkur á óvart

Indriði Sigurðsson skoraði mark Íslands í 2-1 tapi liðsins fyrir Skotum á Hampden Park í Glasgow í gærkvöldi.

Hann var vitanlega ánægður með að hafa skorað í leiknum. „Það er svekkjandi að það skilaði ekki meiru. Það hefði verið skemmtilegra að fá stig," sagði Indriði eftir leik í gær.

Hann sagðist þokkalega ánægður með eigin frammistöðu. „Miðað við að ég hef verið að spila sem miðvörður og var settur á kantinn þar sem ég hef ekki spilað lengi. En það kom okkur ekkert óvart á þessum leik enda mættum við mjög vel undirbúnir til leiks. Á endanum voru það mistökin báðum endum vallarins sem reyndust okkur dýrkeypt."

Hann sagði þó að sigurmark Skota hefði aldrei átt að fá að standa.

„Í fyrsta lagi var þetta útspark en ekki hornspyrna. Svo var brotið á Hemma þegar skallinn kom inn á markteiginn. Mér sýndist dómarinn ætla að flauta á þetta en þá kom markið og hann þorði kannski ekki að dæma það af enda var löglegt mark dæmt af Skotum um síðustu helgi."