Arnór: Viðbúið að ég yrði einmana

Arnór Smárason var svekktur eins og aðrir leikmenn íslenska landsliðsins eftir að liðið tapaði, 2-1, fyrir Skotum á Hampden Park í kvöld.

„Það er fyrst og fremst svekkelsi sem kemur upp í hugann strax eftir leik," sagði Arnór. „Við áttum góðan möguleika á að ná jafntefli í þessum leik. Við sóttum mikið á þá undir lok leiksins og það hefði verið sætt að fá annað mark þá."

Hann sagðist sáttur við eigin frammistöðu.

„Það var svo sem vitað að ég yrði einmana þarna í sókninni enda var ég nokkurn veginn á eyðieyju þar. En maður reynir alltaf að gera sitt besta og berjast fyrir landið. Ég er því þokkalega sáttur."