Skynsamlegt að leita til Mannréttindadómstólsins

Sigurður Kári Kristjánsson, þingmaður Sjálfstæðisflokksins, segir skynsamlegt að ríkisstjórnin ætli að leita réttar síns gagnvart Bretum fyrir Mannréttindadómstóli Evrópu. Ríkisstjórnin ákvað á fundi sínum í morgun að höfða ekki mál gegn breska ríkinu en kanna til þrautar möguleika á að leita réttar Íslendinga fyrir Mannréttindadómstólnum.

Ríkisstjórnin hyggst jafnframt styðja af alefli við málsókn skilanefndar Kaupþings vegna framgöngu breska Fjármálaeftirlitsins gegn Singer & Friedlander, dótturfyrirtækis Kaupþings, þann 8. október 2008, en þá yfirtók eftirlitið rekstur bankans með þeim afleiðingum að móðurfyrirtækið komst í greiðsluþrot.

Sigurður hefur talað fyrir því að hart mæti hörðu og segir að ákvörðun ríkisstjórnarinnar byggi á mati og yfirlegu færustu lögmanna bæði hérlendis og erlendis. ,,Að láta reyna á réttmæti þessara aðgerða fyrir tveimur dómstólum sýnir að stjórnvöld ætla ekki að sætta sig við framferði Breta."

Sigurður telur að málshöfðun skilanefndar Kaupþings eigi ekki að þurfa að taka langan tíma. Framhaldið ráðist alfarið á niðurstöðu breskra dómstóla. ,,Það er augljóst ef að niðurstaðan verður Kaupþingi í hag munu þeir aðilar sem sýnt geta fram á að þeir hafi orðið fyrir tjóni farið í skaðabótamál þar sem gríðarlegir hagsmunir eru undir."

Ef niðurstaðan verður Kaupþingi í hag telur Sigurður að bresk stjórnvöld muni sjá sæng sína útbreidda og setjast við samningaborðið með íslenskum stjórnvöldum til að semja um hugsanlegar skaðabætur. Aftur á móti sé ómögulegt að segja til hver niðurstaðan í málinu verði. ,,Breskir dómstólar hafa aldrei verið hræddir við að dæma breska ríkinu í óhag þannig að ég er bjarsýnn á þeir taki á málinu með hlutlausum hætti."