Skilar bæði arði og árangri

Hringsjá, náms- og starfsendurhæfing, er gríðarlega arðbær stofnun í rekstri, að sögn Ragnheiðar Lindu Skúla­dóttur, forstöðumanns Hringsjár. Ef nemandi, um þrítugt, sem annars væri á örorkubótum, kemur og endurhæfist á stofnuninni, fær fullt starf á meðallaunum til 67 ára og borgar sinn skatt, skilar hann um það bil jafn miklum peningum til samfélagsins og kostar að reka Hringsjá á ári.

„Starfsemin er ekki bara arðbær heldur eykur hún lífsgæði fólks,“ segir Ragnheiður Linda. Um 80 prósent af þeim sem ljúka námi eru í áframhaldandi námi eða við störf eftir endurhæfingu hjá Hringsjá. Þetta kemur fram í nýrri árangurs­mælingu.

Hringsjá er ætluð fólki yfir 18 ára sem orðið hefur fyrir skakkaföllum í lífinu, lent í alvarlegum slysum eða verið atvinnulaust í langan tíma. Endurhæfingin felst í einstaklingsmiðuðu námi með sérhæfðri ráðgjöf. „Markmiðið er að fólk öðlist færni við að fá störf sem henta því,“ segir Ragnheiður Linda. Sá sem vill stunda námið þarf að sækja sjálfur um en umsóknin er studd meðmælabréfi frá viðurkenndum aðila sem þekkir vel til haga viðkomandi og telur námið henta vel.

Námsefnið er einstaklingsmiðað og rifjar upp síðustu árin í grunnskóla og fyrstu framhaldsskólaárin. „Námið getur verið einingabært og er metið til eininga í öðrum framhaldsskólum. Fólk frá okkur hefur líka farið beint í frumgreinadeild í háskólunum,“ segir Ragnheiður Linda.

Námsfögum er skipt í þrennt: almenn bóknámsfög, eins og íslenska, stærðfræði og félagsfræði og létt störf, eins og tölvur og bókhald. Síðan eru fög sem lúta að persónulegri og félagslegri tækni eins og leiklist og tjáning.

Nemendur Hringsjár eru 18 ára og eldri, konur í meirihluta. Meðal­aldur nemenda er í kringum 40 ára. Félagslífið er nokkuð öflugt, þrátt fyrir þetta breiða aldursbil. „Við erum með tyllidaga, haustferð og þegar kreppan skall á var hamingjuvika. Við leggjum mest upp úr persónulegri nálgun. Að fólk finni öryggi og tilgang og að það sjálft skipti máli.“

vidir@frettabladid.is