Bólivía valtaði yfir Argentínu

Diego Maradona upplifði í kvöld fyrsta áfallið sitt sem landsliðsþjálfari Argentínu þegar lið hans var kjöldregið 6-1 af Bólivíu í undankeppni HM.

Framherjinn Joaquin Botero skoraði þrennu fyrir Bólivíu í leiknum og engu líkara en að Argentínumennirnir hafi ekki náð andanum í þunna loftinu í La Paz, en leikurinn fór fram í 3,600 metra hæð yfir sjávarmáli.

Þetta var versta tap Argentínu síðan liðið tapaði 5-0 á heimavelli fyrir Kólumbíu árið 1993.

Argentínumenn hafa 19 stig eftir 12 leiki í Suður-Ameríkuriðlinum, en Bólivía er með 12 stig.

Argentína hafði unniði fyrstu þrjá leiki sína undir stjórn goðsagnarinnar án þess að fá á sig mark, en lærisveinar hans voru niðurlægðir af minni spámönnum í kvöld.