Drillo kemur í Laugardalinn í haust

Norska knattspyrnusambandið hefur ákveðið að Egil „Drillo" Olsen muni stjórna norska fótboltalandsliðinu út undankeppni HM í Suður-Afríku en Norðmenn eru eins og kunnugt með Íslendingum í riðli.

„Það sem við höfum séð hingað til er nógu gott til þess að Egil Olsen verði áfram landsliðsþjálfari út undankeppnina," sagði í yfirlýsingu frá Sondre Kaafjord, forseta norska sambandsins.

Það er því ljóst að Drillo kemur með norska landsliðið í Laugardalinn í byrjun september en hann var fyrst fenginn til að stjórna norska landsliðinu á meðan leitað var að nýjum þjálfara. Ísland og Noregur mætast á Laugardalsvellinum 5. september og er það lokaleikur Íslands í undankeppninni.

Norðmenn eru eins og er neðstir í riðlinum með aðeins tvö stig í þremur leikjum en landsliðið vann ekki einn einasta landsleik á síðasta ári. Í kjölfar þess var Åge Hareide rekinn eftir að hafa þjálfað landsliðið frá 2003.

Egil „Drillo" Olsen stjórnaði norska landsliðinu í fyrra skiptið frá 1990-98 og undir hans stjórn komst liðið inn á tvær heimsmeistarakeppnir (1994 og 1998) og fór hæst í annað sætið á Styrkleikalista FIFA.

Olsen hefur stjórnað liðinu í tveimur landsleikjum síðan að hann tók tímabundið við landsliðinu, sigri gegn Þjóðverjum og svo tapi gegn Suður-Afríku um helgina. Alls hefur Noregur spilað 93 landsleiki undir hans stjórn og aðeins tapað 15 þeirra.

Norðmenn mæta Finnum í vináttuleik í Osló á morgun. Leikurinn fer fram Ullevaal-leikvanginum þar sem landsliðið hefur ekki tapað undir stjórn Drillo síðan árið 1991.