Súrálsfjúk eftir bilun í löndunarbúnaði

Bilun kom upp í löndunarbúnaði sem notaður er til að flytja súrál í súrálsgeymi álversins á Reyðarfirði og haugur af súráli féll niður á jörð. Ekki er ljóst á þessari stundu hversu mikið magn súráls féll til jarðar.

Að sögn Ernu Indriðadóttur, upplýsingafulltrúa Alcoa Fjarðaráls, virkar löndunarbúnaðurinn eins og færiband. Bárujárnsplata í löndunarbúnaðinum losnaði hins vegar með ofangreindum afleiðingum.

Framan af degi var logn á svæðinu, en þegar blés upp tók súrálið hins vegar að fjúka um svæðið.

Erna segir þegar hafa verið hafist handa við að hreinsa upp súrálið, en stefnt er að því að klára hreinsunarstarfið í nótt.

Súrál er ekki flokkað sem spilliefni og veldur ekki umhverfisspjöllum við þessar kringumstæður, en efnið er afar hart og getur valdið skemmdum, til dæmis á bílum, svipað og sandfok.

Ernu er þó ekki kunnugt um að slíkt hafi komið fyrir og telur ólíklegt að nokkrar skemmdir hljótist af óhappinu. Hún segir tiltölulega lítið magn súráls hafa fokið af stað.