Norðurlandamót í Bridge á Laugar­vatni alla helgina

Mótið hófst á fimmtudaginn í Menntaskólanum að Laugarvatni og hafa fulltrúar Norðurlandanna verið að spila á fullum krafti síðan.

Matthías Imsland er framkvæmdastjóri Bridgesambands Íslands og er allt í öllu á Laugarvatni i tengslum við mótið.

„Aðstaðan á Laugarvatni er orðin alveg frábær. Vistirnar eru flottar og það er góð aðstaða og það er líka þannig að þegar við erum að halda þessi norðurlandamót að spilarar vilja vera saman í staðinn fyrir ef við værum í Reykjavík þá væru þeir að dreifast út um allt,“ segir Matthías.

Um 80 þátttakendur eru á mótinu en sex lið eru í opnum flokki og sex lið í kvennaflokki.

„Það er Ísland, Færeyjar, Danmörk, Noregur, Finnland og Svíþjóð,“ segir Matthías. Hann á von á spennandi móti.

„Já ég á von á því. Það er gaman að segja frá því að í opna flokknum er Ísland efst þegar þrjár umferðir eru búnar þannig að við erum gríðarlega spennt hvernig það fer og kvennaliðið hefur verið að standa sig ágætlega líka“.

Matthías segir að áhugi á bridge á Íslandi sé alltaf að aukast og aukast enda meira og minna uppselt á öll námskeiðin, sem Bridgesamband Íslands hefur boðið upp á þar sem þátttakendum er kennt að spila bridge og farið er í gegnum allar reglurnar í spilinu.

En getur fólk komið á Laugarvatn um helgina og fylgst með Norðurlandamótinu eða hvað?

„Já, fólk getur komið og fylgst með. Það er opið og getur labbað um. Það er salur, fyrirlestrasalurinn á Laugarvatni en þar erum við með útsendingu þar sem fólk getur fylgst með og svo erum við líka með beina útsendingar á netinu frá leikjum þannig að fólk getur fylgst með heiman frá sér líka,“ segir Matthías.