Reglur verða hertar hjá Skotum

Gordon Smith, yfirmaður skoska knattspyrnusambandsins, hefur gefið það út að agareglur í kring um landsliðið verði hertar eftir uppákomuna fyrir leik liðsins gegn Íslendingum í gær.

Rangers-mennirnir Allan McGregor og Barry Ferguson fengu sér hressilega í glas eftir landsleikinn við Hollendinga og sköpuðu mikinn óróa í herbúðum liðsins fyrir Íslandsleikinn.

"Við munum herða allar reglur leikmanna þegar þeir eru á hótelum á landsliðsferðum og ef þeir hlýða þeim ekki, verður brugðist fljótt og hart við því," sagði Smith.

"Atburðirnir fyrir leikinn gegn Íslendingum voru óheppilegir og hefðu í versta falli getað truflað liðið. Sem betur fer tókst að leysa málið og vinna leikinn. Við lítum þannig á að þessu máli sé lokið," sagði Smith.