Capello: Við spilum að sjálfsögðu til sigurs

Landsliðsþjálfarinn Fabio Capello hjá Englandi vill að leikmenn sýni úr hverju þeir eru gerðir í leiknum gegn Úkraínu í undankeppni HM 2010 í dag.

Englendingar eru þegar búnir að tryggja sér farseðilinn á lokakeppnina með því að vinna alla átta leiki sína til þessa í riðlinum en Capello segir leikinn mjög mikilvægan.

„Fyrir mér er þetta ekki einhver æfingarleikur. Þetta er leikur í undankeppni HM 2010 og því er hann mjög mikilvægur. Ég hef sagt við leikmenn mína að ég ætlist til af þeim að þeir spili jafn vel í þessum leik og í hinum leikjunum í riðlinum. Eins og alltaf þá spilum við að sjálfsögðu til sigurs," sagði Capello á blaðamannafundi fyrir leikinn.