Corluka bað króatísku þjóðina afsökunar

Vedran Corluka bað króatísku þjóðina opinberlega afsökunar á rauða spjaldinu sem hann fékk í 1-0 sigri Króata á Hvíta-Rússlandi í gær.

Corluka missir þar með af leik Króata gegn Englendingum á miðvikudagskvöldið. Leikurinn skiptir sköpum fyrir bæði lið en með sigri geta Englendingar tryggt sér farseðilinn til Suður-Afríku.

Corluka fékk að líta sitt annað gula spjald seint í leiknum fyrir að tefja leikinn.

Fjarvera hans er mikið áfall fyrir króatíska landsliðið því fyrir vantaði Luka Modric sem á við meiðsli að stríða. Slaven Bilic, landsliðsþjálfari Króata, sagði eftir leikinn að lið hans væri eins og „særður hvolpur" án þessara tveggja leikmanna.