Reykjavíkurmeistaratitilinn undir í Egilshöllinni í kvöld

Íslandsmeistarar Vals og bikarmeistarar KR hafa mæst í mörgum úrslitaleikjum síðustu ár í kvennafótboltanum og fyrsti úrslitaleikur liðanna á nýju ári verður í Egilshöllinni klukkan 19.00 í kvöld.

Liðin mætast þá í lokaumferð Reykjavíkurmóts kvenna en fyrir leikinn eru félögin efst og jöfn. Markatala Vals er samt miklu betri og dugir Hlíðarendastúlkum því jafntefli til þess að tryggja sér titilinn.

Valsstúlkur eiga titil að verja en þessi tvö félög, Valur og KR, eru þau einu sem hafa unnið Reykjavíkurmeistaratitilinn í kvennaflokki frá því að fyrst var keppt um hann árið 1982. Valur vann hann í sautjánda sinn í fyrra en KR hefur unnið Reykjavíkurmeistaratitilinn tíu sinnum þar af síðast 2006 og 2007.