Kaupmannahöfn er hreinust borga

Það voru rafeinda- og orkurisinn Siemens og breska tímaritið Economist sem gerðu rannsóknina. Hún náði til þrjátíu stórborga í þrjátíu Evrópulöndum.

Tekið var tillit til þátta eins og kolefnisútblásturs, orkunotkunar, bygginga, samgangna, vatns, loftgæða, úrgangs og landnýtingar.

Þetta eru allt talin lykilatriði í baráttunni fyrir bættu loftslagi, því það er jú í borgum og bæjum sem meirihluti mannkynsins býr.

Í rannsókninni kom einnig í ljós að evrópskar borgir eru leiðandi í í umhverfismálum. Þó er þörf fyrir umbætur á ýmsum sviðum.

Endurnýjanleg orka er til dæmis aðeins sjö prósent af orkunotkun borga. Það er langt undir þeim tuttugu prósentum sem Evrópusambandið hefur sett sem markmið fyrir árið 2020.