Njósnari Halmstad fylgist með Jónasi Guðna um helgina gegn Keflavík

Miðjumaðurinn knái Jónas Guðni Sævarsson hjá KR er kominn aftur til landsins eftir að hafa farið á reynslu hjá sænska félaginu Halmstad. Hann var afar sáttur með ferðina þrátt fyrir stutt stopp í Svíþjóð.

„Þetta gekk alveg ágætlega hjá mér í þessa tvo daga. Ég náði einum leik og spilaði í 60 mínútur en ég var aðeins tæpur aftan í læri fyrir leikinn og þeir vissu vel af því. Þjálfarinn hrósaði mér annars bara fyrir það að hafa gert nákvæmlega það sem hann lagði upp með, þannig að það var bara jákvætt. Við sjáum bara til hvað verður úr þessu í framhaldinu," segir Jónas Guðni.

Næsta verkefni hjá Jónasi Guðna er leikur gegn hans gömlu félögum í Keflavík sem kíkja í heimsókn á KR völlinn á sunnudaginn næstkomandi.

„Ég er nú bara farinn að einbeita mér að næsta leik hér heima og það er gegn Keflavík á sunnudag. Ég veit hins vegar að Halmstad ætlar að vera með mann á leiknum til þess að fylgjast með mér og það er bara fínt. Það ræðst svo betur í næstu viku hvort eitthvað gerist í þessu þar sem þeir eru að fara að láta frá sér leikmenn sem spila sömu stöðu og ég.

Ef allt gengur að óskum þá fara þeir væntanlega bara að ræða við KR-inga í framhaldinu og það kemur svo í ljós hvort félögin nái þá saman. Það er því langt í land í þessu en ég er spenntur fyrir þessu og þeir segjast spenntir fyrir mér. Ég lít annars bara á þetta sem viðurkenningu um að verið sé verið að taka eftir manni og sýna manni áhuga," segir Jónas Guðni að lokum.