Burley: Verðum að vinna Ísland

George Burley, landsliðsþjálfari Skota, á ekki von á því að fá mikið úr leiknum gegn Hollandi á laugardaginn en liðið verði að vinna Ísland í næstu viku.

Hann segir að það væri ekkert nema bónus ef liðinu tækist að vinna einhver stig í Amsterdam en Hollendingar eru með fullt hús stiga eftir fyrstu þrjá leikina í riðlinum.

Ísland leikur í sama riðli og mætir Skotum í Glasgow á miðvikudaginn. Ef Holland vinnur Skotland um helgina verða bæði Skotar og Íslendingar með fjögur stig eftir fjóra leiki í öðru sæti riðilsins.

„Leikurinn á laugardaginn er ekki þýðingarlaus en leikurinn gegn Íslandi er sá leikur sem við verðum að vinna."

„Það er enginn vafi um það að leikurinn á Hampden Park á miðvikudaginn verður mjög mikilvægur upp á stöðu liðsins í riðlinum að gera."

„Við þurfum að vinna okkar einstaklingsbaráttur í leiknum gegn Hollandi - maður gegn manni. Liðsheild er aðalmálið og hef ég sagt leikmönnum að þetta snýst alls ekki um einstaklingana."

„Við erum kappsfull þjóð og viljum komast frá leiknum í Amsterdam með stoltið í lagi. Þetta er risastór leikur og mikil prófraun fyrir mína menn."

„Við viljum ekki að við lítum út eins og lítilfjörlegur andstæðingur fyrir framan tólf þúsund stuðningsmenn skoska landsliðsins. Við verðum að gera okkar allra besta fyrir þá."