Átti Obama að hitta Ferguson?

Það hefur mikið verið fylgst með komu Barack Obama Bandaríkjaforseta til Lundúna í tengslum við fund 20 helstu iðnvelda heims. En þegar fréttist af því að Barry Ferguson og Allan McGregor var vísað úr skoska landsliðinu vegna drykkju skolaðist fréttaflutningurinn til á Sky News.

Á texta sem rúllaði yfir skjáinn mátti lesa að „Obama Bandaríkjaforseti er kominn í Downing-stræti til þess að ræða við Barry Ferguson, landsliðsfyrirliða Skotlands, og markvörðinn Allan McGregor sem voru reknir úr landsliðinu vegna agabrots."

Hætt er við því að Obama hafi verið með önnur mál á sinni könnu en agabrot leikmanna skoska landsliðsins skömmu fyrir landsleik gegn Íslandi.