McCormack átti 14 mínútur á Hampden

Ross McCormack var hetja Skota í leiknum gegn Íslandi í gær. Hann skoraði fyrra mark leiksins og var maður leiksins að mati allra dagblaða í Skotlandi.

Fyrir leikinn hafði McCormack aðeins leikið í fjórtán mínútur á þjóðarleikvangi Skota. Það var í bikarleik með Motherwell gegn Queen's Park fyrir tveimur árum síðan.

Þar að auki voru bæði hann og Steven Fletcher, hinn markaskorari Skota í fyrrakvöld, báðir að spila með U-21 liði Skota fyrir ári síðan.

„Það var draumi líkast að skora þetta mark," sagði McCormack. „Þar með rættist draumur hjá mér. Ég var í fyrsta sinn í byrjunarliði skoska landsliðsins á Hampden Park og mér fannst gott af vita af unnustu minni og fjölskyldu í stúkunni."