Luis Fabiano með tvö mörk í langþráðum sigri Brasilíu

Brasilíumenn unnu langþráðan sigur í undankeppni HM þegar liðið vann Perú 3-0 í nótt. Brasilíumenn eru með 21 stig úr 12 leikjum eftir sigurinn en liðið var búið að gera sex jafntefli í fyrstu ellefu leikjunum sínum.

Luis Fabiano, leikmaður Sevilla, skoraði tvö mörk í leiknum og þau bæði í fyrri hálfleik. Fyrra mark Fabiano var úr vítaspyrnu eftir að Kaka hafði verið felldur í teignum en það seinna eftir sendingu frá Elano, leikmanni Manchester City. Felipe Melo skoraði þriðja mark liðsins.

Dunga, þjálfari Brasilíu var ekkert í skýjunum með leikinn en hann hefur væntanlega verið ánægður með að fá loksins mörk á heimavelli en Brasilíu hafi fyrir leikinn gert markalaus jafnteflið í þremur heimaleikjum í röð á móti Argentínu, Bólivíu og Kólumbíu.