Hermann: Langar heim í fýlu

Hermann Hreiðarsson var eðlilega afar niðurlútur eftir tap Íslands fyrir Skotlandi í gærkvöldi á Hampden Park, 2-1.

„Mig langar bara að fara heim í fýlu," sagði Hermann í samtali við Vísi eftir leikinn. „Ekki veit ég hvað við höfum gert þessum knattspyrnuguði - það er alltaf sama sagan gegn þessu liði."

Hermann sagði það eðlilega afar svekkjandi að hafa ekki náð að jafna metin öðru sinn í leiknum enda sótti Ísland stíft lokamínútur leiksins.

„Það kom okkur ekkert á óvart í dag. Þeir voru meira emð boltann en fengu fá færi. Við vörðumst vel en fengum svo skyndilega þetta mark á okkur. Að öðru leyti var planið að ganga vel upp."

„Undir lokin fengum við svo nokkur dauðfæri sem við hefðum átt að nýta. Samt þurfum við ekkert að skammst okkur fyrir frammistöðuna - Skotar voru alltaf sigurstranglegri aðilinn á heimavelli. Við hefðum þó vissulega getað stolið þessu."