Martraðar- og draumabyrjun hjá Íslendingaliðunum

Það byrjaði misvel hjá Íslendingaliðunum Djurgården og Kristianstad í sænsku kvennadeildinni í gær en bæði sóttu þau þá nýliða heim í fyrstu umferð. Kristianstad tapaði 3-0 en Djurgården vann 7-0.

Guðbjörg Gunnarsdóttir og Guðrún Sóley Gunnarsdóttir spiluðu allan leikinn þegar Djurgården tók nýliða Stattena í kennslustund í Helsingborg. Djurgården vann leikinn 7-0 eftir að hafa komist yfir eftir 4 mínútur og verið með 2-0 forustu í hálfleik.

Þjálfaraferill Elísabetar Gunnarsdóttur byrjaði ekki vel því Kristianstad lenti undir eftir aðeins 31 sekúndu á móti Piteå. Piteå bætti síðan við tveimur mörkum í upphafi og lok seinni hálfleiks.

Íslendingarnir þrír, Erla Steina Arnardóttir, Hólmfríður Magnúsdóttir og Guðný Björk Óðinsdóttir spiluðu allan leikinn. Kristianstad átti 21 skot í leiknum gegn 11 hjá Piteå en tapaði engu að síður með þriggja marka mun.