Hægt að fylgjast með Margréti Láru á LFCTV

Margrét Lára Viðarsdóttir og félagar í Linköping spila sinn fyrsta leik í sænsku úrvalsdeildinni í kvöld þegar liðið sækir Sunnanå SK heim. Margrét Lára skoraði þrennu í síðasta æfingaleiknum fyrir mótið og fær örugglega að spreyta sig í kvöld.

Það er mikil eftirvænting fyrir tímabilið hjá Linköping en menn þar á bæ ætla sér stóra hluti eftir að hafa lent í öðru sætinu á síðasta tímabili. Margrét Lára hefur orðið Íslandsmeistari undanfarin þrjú ár og kemur kannski með meistarataktana inn í Linköping-liðið í sumar.

Forráðamenn félagsins tilkynntu á heimasíðu félagsins í gær að Linköping ætlaði að setja af stað eigin sjónvarpsstöð þar sem verður umfjöllun um leikmenn og leiki liðsins. Stöðin sem heitir LFCTV verður þó ekki með beina útsendingu frá sjálfum leikjunum en þar verða viðtöl fyrir og eftir leik.

Það verður hægt að nálgast LFCTV hér.