Guðjón Þórðarson valinn besti stjóri mánaðarins

Guðjón Þórðarson verður valinn besti stjóri febrúarmánaðar í ensku 1. deildinni ef marka má frétt á stuðningsmannasíðu Crewe-liðsins. Greinin er skrifuð af Matt Owen, sem hefur það eftir yfirmanni valnefndarinnar að Guðjón sé þar fyrstur á blaði.

Crewe hefur unnið fjóra af síðustu fimm leikjum sínum undir stjórn Guðjóns og eini tapleikurinn var á móti Leyton Orient (0-1) á Valentínusardaginn. Þessi tólf stig hafa komið Crewe upp í 19. sæti og upp úr fallsæti.

Liðið hefur unnið Southend (13. sæti), Huddersfield (10. sæti), Yeovil (18. sæti) og Brighton (22. sæti) en þessi lið voru fyrir ofan Crewe í upphafi mánaðarins.

Guðjón hefur tekið varnarleik Crewe-liðsins í gegn en liðið fékk aðeins tvö mörk á sig í febrúar. Fram að komu Guðjóns var liðið með næstverstu vörnina í deildinni en fyrir leikina í febrúar þá var Crewe búið að fá á sig 59 mörk í aðeins 27 leikjum eða 2,2 mörk að meðaltali í leik.

Það er aðeins lið Southend United sem fékk jafnmörg stig og Crewe í febrúar en Crewe er bæði með betri markatölu en Southend (10-2 á móti 7-3) og vann líka innbyrðisviðureign liðanna 17. febrúar (1-0).