Ný ríkisstjórn líklega mynduð í dag

Nú stendur yfir flokksráðsfundur Vinstri grænna á Grand Hótel í Reykjavík en fundurinn mun taka afstöðu til þátttöku flokksins í ríkisstjórn með Samfylkingunni. Flokksstjórn Samfylkingarinnar fundar á Hótel Sögu klukkan eitt.

Ný ríkisstjórn verður að öllum líkindum kynnt síðar í dag og er fastlega búist við því að í kjölfarið verði boðað til ríkisráðsfundar á Bessastöðum þar sem formlega stjórnarskipti fara fram.

Formenn flokkanna funduðu með þingmönnum í gær til að leggja lokahönd á stjórnarsáttmálann sem hefur verið tæpar tvær vikur í smíðum. Ekki liggur fyrir hvernig ráðuneytum verðum skipt milli flokkanna en líklegt er að einhver ráðuneyti verði sameinuð og nýir menn komi inn. Árni Páll Árnason, Svandís Svavarsdóttir og Jón Bjarnason hafa verið nefnd í því samhengi.