Eggert: Þetta er bara fótboltaleikur

Eggert Gunnþór Jónsson, leikmaður skoska úrvalsdeildarfélagsins Hearts, sagðist vitanlega spenntur fyrir leiknum gegn Skotum á Hampden Park í Glasgow á morgun.

„Þessi leikur er kannski aðeins nær mér en öðrum leikmönnum þar sem ég hef búið lengi í þessu landi," sagði hann á blaðamannafundi íslenska landsliðsins í kvöld. „Ég vil því auðvitað standa mig vel. En ég tel samt að það sé engin aukapressa á mér vegna þessa."

Hann býst við því að skoskir áhorfendur muni vera duglegir að láta í sér heyra á leiknum eins og þeir eru þekktir fyrir.

„Ég efast ekki um að stemningin verði mögnuð. En þegar út í leikinn er komið er maður lítið að spá í því og leikmenn munu eflaust gleyma því fljótt. Þetta er bara fótboltaleikur eins og hver annar."