Ágreiningur bankanna og Exista mun enda fyrir dómstólum

Lýður Guðmundsson, stjórnarformaður Exista, segir ljóst að ágreiningur gömlu bankanna og Exista um hvernig gera eigi upp eignir og skuldir endi fyrir dómstólum eins og staðan sé í dag. Skilanefndir bankanna tjá sig ekki um málið.

Exista á meðal annars rekstrarfélögin VÍS, Skipti, Lífís og Lýsingu. Hart er nú deilt um framtíð félagsins, en innlendir kröfuhafar sem eru skilanefndir gömlu bankanna ásamt Nýja Kaupþingi vilja að félaginu verði skipt upp í sjálfstæðar einingar. Þá hefur einnig verið uppi sú krafa að stjórnendur þess víki.

Forsvarsmenn Exista ætla ekki að verða við þeim kröfum og telja að þær eigi sér ekki stoð í raunveruleikanum. Lýður Guðmundsson, stjórnarformaður félagsins, segir að stærstu kröfuhafar þess séu 37 erlendir bankar sem búið sé að semja við. Íslensku bankarnir séu í engri aðstöðu til að krefjast eins né neins, hvorki greiðslustöðvunar á félaginu né þess að stjórnendur víki.

„Ég get því miður ekki tjáð mig um það," segir Lýður Guðmundsson aðspurður hversu háar kröfur kröfuhafarnir telji sig eiga á hendur Exista.

Spurður hvernig kröfurnar eru komnar til segir Lýður: „Exista átti fullt af eignum hjá gömlu bönkunum og jafnframt skuldaði þeim fé. Við teljum að eignir okkar og skuldir hafi jafnast út við þrot bankanna, en þeir telja svo ekki vera. Ég held að það sé ljóst að þetta mál mun enda fyrir dómstólum eins og staðan er í dag."

Hvorki skilanefnd Kaupþings né Nýja Kaupþing vildu tjá sig um málið þegar fréttastofa leitaði eftir því í dag. Þá fengust ekki heldur viðbrögð frá skilanefndum Glitnis og Landsbankans.