Ólafur: Slæmt að missa Brynjar - Davíð í hópinn

Það varð endanlega ljóst í morgun að miðjumaðurinn Brynjar Björn Gunnarsson mun ekki geta leikið með Íslandi gegn Skotum á miðvikudag. Sæti hans í hópnum tekur FH-ingurinn Davíð Þór Viðarsson.

„Það var verið að prófa Brynjar í morgun og hann mun ekki ná þessu. Hann gat ekki hlaupið einu sinni áðan," sagði Ólafur Jóhannesson landsliðsþjálfari við Vísi.

„Það er mjög slæmt að missa mann eins og Brynjar út. Hann er traustur leikmaður sem skilar alltaf sínu fyrir landsliðið. Er þess utan með mikla reynslu úr enska boltanum þannig að það munar um hann," sagði Ólafur.

Sjálfur er Ólafur á leið til Hollands ásamt aðstoðarmanni sínum, Pétri Péturssyni, til að fylgjast með leik Hollands og Skotlands.