Tardelli ætlar að hvísla ítalska þjóðsönginn

Marco Tardelli, aðstoðarlandsliðsþjálfari Íra, segist ætla að hvísla með þegar ítalski þjóðsöngurinn verður leikinn í Bari á leik Ítala og Íra annað kvöld.

Tardelli er aðstoðarmaður Giovanni Trappatoni landsliðsþjálfara Íra og er fyrrum landsliðsmaður sjálfur. Hann segist ekki geta gleymt því svo glatt þó hann taki starfi sínu alvarlega.

"Ég er fagmaður og verð að sýna vinnuveitendum mínum virðingu," sagði Tardelli á blaðamannafundi.

Ítalir eru í efsta sæti 8. riðilsins með 13 stig en Írar í öðru sæti með 11 stig og hafa þessi lið stungið af í riðlinum. Búlgaría og Kýpur koma næst með 4 stig en eiga bæði leik til góða á toppliðin.