Hutton vill halda McGregor í markinu

Alan Hutton, leikmaður Tottenham og skoska landsliðsins, vill að Allan McGregor, fyrrum liðsfélagi sinn hjá Rangers, haldi sæti sínu í marki Skota. McGregor stóð vaktina í marki Skota gegn Hollendingum ytra um helgina og fékk á sig þrjú mörk.

Hann hefur verið gagnrýndur fyrir frammistöðu sína, sérstaklega í öðru markinu. Craig Gordon, markvörður Sunderland, sat á bekknum.

„Hann hefði ekki getað gert neitt betur í þessum mörkum," sagði Hutton í samtali við breska fjölmiðla. „Ég sé enga ástæðu fyrir því að hann ætti ekki að geta haldið stöðu sínu í liðinu."

George Burley, landsliðsþjálfari, sagði að hann þyrfti að taka nokkrar erfiðar ákvarðanir fyrir leikinn á morgun. Ein þeirra er hvort hann eigi að treysta áfram á McGregor í markinu.

Aðstoðarmaður Burley, Terry Butcher, gaf í skyn að McGregor hafi staðið sig ágætlega í leiknum.

„Hann fékk svo sem ekki mikið að gera en miðað við færin sem við gáfum þeim hefði hvaða lið sem er getað skorað þessi mörk."