Burley sá óöruggasti í starfi

Samkvæmt veðmálafyrirtækjum í Bretlandi þykir George Burley, landsliðsþjálfari Skota, óöruggastur í starfi af þeim landsliðsþjálfurum sem starfa á Bretlandseyjum.

Burley hefur aðeins unnið einn af sínum átta landsleikjum síðan hann tók við starfi þjálfarans og var sá sigur gegn Íslandi í haust.

Skotland hefur enn fremur ekki unnið á Hampden Park síðan 2007. Ef Skotland tapar fyrir Íslandi á morgun er ljóst að það verður mikill þrýstingur á skoska landsliðsþjálfaranum.

Hjá veðmálafyrirtækinu William Hill eru líkurnar á því að Burley verði fyrstur látinn taka poka sinn ellefu á móti tíu. Næstóöruggastur þykir Giovanni Trappatoni hjá Írlandi (1/3), þá John Toshack hjá Wales (2/7), Fabio Capello hjá Englandi (1/10) en öruggastur þykir Nigel Worthington, þjálfari Norður-Íra (1/10).

Skotar þykja mun sigurstranglegri í leiknum á morgun eða fimmtán á móti átta. Jafntefli er með líkurnar 5/2 og íslenskur sigur 9/2.