Capello: Leikmenn mínir óttast ekkert

Fabio Capello, landsliðsþjálfari Englendinga, hefur trú á því að leikmenn landsliðsins séu loksins farnir að leika eins vel fyrir landsliðið og þeir gera með félagsliðum sínum.

Leikmenn eins og Frank Lampard og Steven Gerrard hafa oft verið gagnrýndir fyrir að ná ekki sínu besta fram með landsliðinu en Capello virðist hægt og bítandi vera að ná breytingum fram hjá leikmönnunum.

„Ég held að allir leikmennirnir hafi mikið sjálfstraust. Þeir spila án ótta. Þeir geta nú spilað af sama sjálfstrausti fyrir landsliðið og þeir gera með félagsliði sínu. Það hafa þeir ekki gert með landsliðinu áður," sagði Ítalinn harði en Englendingar mæta Úkraínu á Wembley annað kvöld.

„Ég var mjög ánægður eftir Slóvakíuleikinn um helgina. Hreyfingar með og án bolta voru mjög góðar. Við sköpuðum okkur þess utan tækifæri og skoruðum mörk. Sá leikur var mjög mikilvægt próf fyrir okkur. Þessi leikur hjálpaði líka mikið til við sjálfstraustið. Nú taka áhorfendur líka vonandi vel við sér og við gerum Wembley að alvöru gryfju."