Skotar æfa föstu leikatriðin fyrir Íslandsleikinn

Meiðslalistinn hjá Skotum gæti verið að styttast ef marka má fréttir úr herbúðum skoska landsliðsins. Aðstoðarlandsliðsþjálfarinn Terry Butcher staðfesti það við fréttamenn að Stephen McManus og Alan Hutton gætu báðir byrjað á móti Íslandi á miðvikudaginn.

McManus var ekkert með í 0-3 tapi á móti Hollandi um helgina en Hutton kom inn á sem varamaður í leiknum.

„Stephen McManus er kominn til baka og ætlar að gera allt til þess að vera með. Við erum bjartsýnir," sagði Butcher sem segist hafa fagnað því að sjá Hutton kom við sögu gegn Hollendingum.

Butcher segir að skoska liðið þurfti að bæta vörnina sína í föstum leikatriðum en annað mark Hollendinga kom þegar Robin Van Persie skallaði boltann í markið eftir hornspyrnu Arjen Robben.

„Það voru mikil vonbrigði að fá á sig þetta annað mark. Við vitum að föstu leikatriðin gætu ráðið úrslitum í leiknum á móti Íslandi á miðvikudaginn. Við erum að æfa þau fram að leik," sagði Butcher.