Árni Matt er Skítseyði ársins

Árni Mathiesen fjármálaráðherra vann yfirburðarsigur í kosningu um Skítseyði ársins 2008 meðal hlustenda X-ins 977. Það var útvarpsþátturinn Harmageddon sem stóð fyrir valinu og voru hlustendur hvattir til að hringja inn atkvæði sín síðustu tvær vikurnar í desember.

Niðurstaðan var afgerandi. Árni M. Mathiesen var hlutskarpastur með talsvert meiri atkvæðafjölda en næsti maður á eftir og er því óumdeilt Skítseyði þessa viðburðaríka árs sem nú er liðið.

„Við teljum að Árni sé vel að þessari nafnbót kominn enda hafði hann afgerandi forustu jafnvel áður en umboðsmaður Alþingis sendi honum tóninn í lok árs. Það að yfirmaður fjármála, í landi sem gengur í gegnum slíka fjármálakrísu eins og við höfum gert, skuli sitja áfram keikur í sínu embætti er líka talsvert skítlegt að okkar mati," segir í tilkynningu frá þættinum.

Árni hlýtur að launum forláta mannaskítsmynd, sem tekinn er af saur íslensks kvótaerfingja. „En þess má til gamans geta að Árni tilheyrir þeirri klíku sem einmitt gáfu þessa dýrmætu auðlind þjóðarinnar fáum útvöldum á sínum tíma," segir í tilkynningunni.

Útvarpsþátturinn Harmageddon mælist til þess að myndin verði hengd upp í Fjármálaráðuneytinu til þess að Árni geti minnt sig á hvaða gæfu hann hefur fært þjóð sinni á undanförnum misserum. Einnig fær hann ársbyrgðir af klósettpappír.

Um leið völdu hlustendur „Hetju ársins". Þar var Egill Helgason hlutskarpastur. Hann fær engin verðlaun. Enda að mati Harmageddonmanna með fín laun frá ríkinu hvort sem er.