Tugþúsundir flýja heimili vegna eldsumbrota

Um það bil 50.000 Filippseyingar flýja nú heimili sín vegna jarðhræringa sem taldar eru boða gos úr kröftugasta eldfjalli eyjanna.

Mayon-eldfjallið er það virkasta á Filippseyjum og hefur gosið rúmlega 50 sinnum á síðustu 400 árum. Nú eru jarðhræringar hafnar í nágrenni fjallsins og glóandi hraunkvika tekin að vella niður hlíðar þess. Jarðvísindamenn á Filippseyjum telja þetta ekki boða neitt gott og nú eru 50.000 íbúar í nágrenni fjallsins í óða önn að pakka saman og rýma heimili sín.

Öllu þessu fólki er komið fyrir til bráðabirgða í skólum og íþróttasölum um alls Albay-héraðið en þar er Mayon-fjallið staðsett. Talsmaður almannavarna héraðsins segir ástandið ekki gott, hægt sé að útvega mat og drykkjarvatn handa fólkinu í einn mánuð en það gæti þurft að vera mun lengur en það að heiman ef það á þess þá nokkurn tímann kost að snúa aftur til heimkynna sinna. Það fer eftir því hvort fjallið gýs og hve umfangsmikið gosið verður ef svo fer.

Hjálparstofnanir á Filippseyjum og víðar eru þegar teknar að undirbúa matarsöfnun auk þess sem teppum og fatnaði er safnað saman handa fólkinu. Mikil eldvirkni er á Filippseyjum sem eru staðsettar á eins konar eldhring, belti eldfjalla sem liggur um Kyrrahafið og gerir það að verkum að jarðskjálftar eru einnig tíðir þar. Á Filippseyjum einum eru 22 virk eldfjöll og þar varð síðast stórt eldgos árið 2006.