Senderos leikur sinn fyrsta Arsenal-leik í langan tíma

Svisslendingurinn Phillippe Senderos mætir aftur í miðju Arsenal-varnarinnar þegar liðið mætir West Brom í enska deildarbikarnum í kvöld en hann hefur ekkert spilað með liðinu síðan í maí 2008. Senderos hefur ekki náð að sýna sitt besta hjá Lundúna-liðinu og var á láni hjá AC Milan á síðasta tímabili.

Phillippe Senderos er enn bara 24 ára gamall en hann lék 115 leiki fyrir Arsenal síðan að hann kom til liðsins árið 2003. „Ég lít ekki á að hann sé að byrja feril sinn upp á nýtt því við vitum alveg hversu góður hann er. Þetta er samt eins og nýtt upphaf. Hann er enn ungur fyrir miðvörð, hann á framtíðina fyrir sér og bestu tíu árin ferilsins eru framundan," sagði Arsene Wenger, stjóri Arsenal.

Phillippe Senderos mun spila með Mikael Silvestre í miðri vörn Arsenal í leiknum í kvöld en að venju teflir Arsene Wenger fram hálfgerðu unglingaliði í leiknum en hann hefur haft þann háttinn á undanfarin tímabil að gefa yngri leikmönnum tækifæri til að sína sig í deildarbikarnum.

Meðal ungra og óþekktra leikmanna sem fá tækifærið í kvöld eru 19 ára pólskur markvörður að nafni Wojciech Szczesny og tveir 18 ára Frakkar sem heita Gilles Sunu og Francis Coquelin. Stuðningsmenn Arsenal fá líka loksins að sjá hinn 17 ára Jack Wilshire sem blómstraði á undirbúningstímabilinu.