Ólafur: Hef mikla trú á Bjarna Ólafi

Vísir hitti á Ólaf Jóhannesson nú skömmu fyrir leik Skotlands og Íslands á Hampden Park þar sem hann ræddi byrjunarlið sitt sem hann tilkynnti nú síðdegis.

Hann gerði þrjár breytingar á liðinu sem mætti Liechtenstein á La Manga í febrúar síðastliðnum. Þeir Bjarni Ólafur Eiríksson, Pálmi Rafn Pálmason og Helgi Valur Daníelsson komu nýir inn í liðið.

Bjarni Ólafur er eini leikmaðurinn í íslenska leikmannahópnum sem leikur ekki erlendis en Ólafur sagðist ekki vera hræddur við að setja hann í byrjunarliðið af þeirri ástæðu.

„Ekki fyrir fimm aura. Ég hef alltaf haft mikla trú á Bjarna Ólafi enda góður fótboltamaður. Hann var í liðinu hjá mér þegar ég byrjaði en svo meiddist hann og datt út. Þá tók Indriði stöðuna," sagði Ólafur en Indriði leikur nú á vinstri kantinum.

„Ég vildi setja varnarsinnaðan mann á vænginn," sagði Ólafur um hlutverk Indriða í leiknum. „Þeir verða grimmir á vængjunum og bakverðirnir koma hátt upp á völlinn. Hinum megin er svo Pálmi Rafn sem er fínn í fótbolta og ef til vill betri á boltanum en Indriði. En ég treysti honum líka til að skila sínu varnarhlutverki vel."

Ólafur ákvað að stilla Helga Val Daníelssyni við hlið Arons Einars Gunnarssonar á miðjunni en ekki Eggerti Gunnþóri Jónssyni eins og kom til greina.

„Helgi Valur býr yfir líkamlegum styrk. Hann er þar að auki rólegur og yfirvegaður á boltanum. Hann er alhliða góður miðjumaður."

Arnór Smárason fær það mikilvæga hlutverk að vera einn í sókninni en hann mun njóta góðs stuðnings Eiðs Smára Guðjohnsen.

„Það er auðvitað alltaf áhættusamt að setja ungan leikmann í svona leik," sagði Ólafur um Arnór. „En ég tel að hann geti sinnt sínu hlutverki og klárað sitt mjög vel. Þarna réði mestu að hann er fljótur og frískur leikmaður."

Að síðustu var Ólafur spurður um þá ákvörðun að velja Gunnleif Gunnleifsson í markið á kostnað Árna Gauts Arasonar.

„Það var mjög erfið ákvörðun. Við erum með tvo frábæra markverði og það er sama hvor þeirra hefði verið í marki - enda treysti ég þeim báðum 100 prósent. Á endanum komst ég að þessari niðurstöðu en ákvörðunin var erfið."

Leiknum verður lýst beint á Boltavakt Vísis og Fréttablaðsins.