Ísland til sölu á Netinu

Tveir framtakssamir hugsjónamenn, þeir Friðgeir Torfi Ásgeirsson og Hafliði Sigfússon, hafa ákveðið að selja Ísland á Netinu og nota ágóðann af sölunni til að losa landið úr skuldafeninu.

Með athæfi sínu hyggjast þeir um leið gagnrýna hvernig stjórnvöld hafa staðið að málefnum tengdum fjármálakreppunni, einkum hvað varðar samskipti við erlend stjórnvöld, stofnanir og fólkið í landinu.

„Við viljum sýna þeim löndum sem hafa orðið fyrir barðinu á hruni hinna íslensku banka að Íslendingar sem slíkir vilji þeim ekkert illt og myndu glaðir greiða tilbaka hverja krónu, pund eða evru ef þeir gætu. Þannig að með því að „selja" Ísland á netinu og gefa andvirði sölunnar til góðgerðarmála í þeim löndum sem bankahrunið snertir, viljum við sýna velvild Íslendinga í þeirra garð og ósk Íslendinga um að vera áfram í góðum samskiptum við þau," segja Friðgeir og Hafliði í tilkynningu.

Hafa þeir sett upp heimasíðuna icelandicfiresale.com þar sem þeir skipta Íslandi í 10.000 reiti. Hver reitur er svo falur fyrir 100 dali sem nú jafngilda 13.400 krónum.

„Reitirnir virka sem auglýsing fyrir kaupandann. Þegar gestir heimasíðunnar smella á keyptan reit fara þeir yfir á heimasíðu auglýsandans. Ef Ísland selst upp gæti heimasíðan náð að safna svo mikið sem 1.000.000 USD [134.000.000 kr.], sú upphæð (eða svo mikið sem safnast) mun renna til góðgerðamálefna í löndum sem hafa orðið fyrir barðinu á fjármálakreppunni," útskýra þeir félagar enn fremur.

„Við munum biðja kaupendur um að tilnefna hvaða land þeir vilja að peningarnir sínir renni til, peningar sem ekki verða tilnefndir munu verða notaðir í kostnað."