Segja stjórnarsamstarfið standa traustum fótum

Ríkisstjórnarsamstarfið stendur traustum fótum þrátt fyrir mótbyr í efnhagsmálum að mati ráðherra Samfylkingarinnar og Sjálfstæðisflokks. Ríkisstjórnin heldur upp á eins árs afmæli í dag.

Í dag er liðið eitt ár frá undirritun stjórnarsáttmála Sjálfstæðisflokks og Samfylkingar á þingvöllum en með því lauk 12 ára stjórnarsamstarfi Framsóknarflokks og Sjálfstæðisflokks.

Í stefnuyfirlýsingu ríkisstjórnarinnar kemur meðal annars fram að markmið hagstjórnarinnar sé að tryggja lága verðbólgu, lágt vaxtastig og betra jafnvægi í utanríkisviðskiptum. Segja má að erfiðilega hafi gengið fyrir ríkisstjórnina að ná þessum markmiðum á fyrsta starfsári sínu enda verðbólga ekki verið meiri í nærri 20 ár og stýrivextir í sögulegu hámarki.

Jóhanna Sigurðardóttir félagsmálaráðherra segir að ríkisstjórnin hafi lent í ýmsum vandamálum. Þorskaflabresti, stöðunni á lánamörkuðum, sem sé ekki bara innanlandsvandamál heldur alþjóðlegt, og miðað við þá stöðu hafi ríkisstjórnin staðið sig með prýði.

Undir þetta tekur Össur Skarphéðinsson iðnaðarráðherra. „Ríkisstjórnin hefur náð ákaflega vel saman og við höfum verið að koma eða erum að ná í gegn ákveðnum svona djúpristum umbótamálum. Eg nefni t.d. á menntakerfinu, heilbrigðismálum og sérstaklega orkumálum sem er mér kær málaflokkur," segir Össur.

Þorgerður Katrín Gunnarsdóttir menntamálaráðherra segir að þrátt fyrir hörð skoðanaskipti eins og í hvalveiði- og varnarmálum sé samstarfið gott. „Það eru engin átök milli ráðherra. Menn hafa bara opinská skoðanaskipti en það er samtakamáttur mikill að halda áfram með ákveðin mál hér í samfélaginu sem stuðla að aukinni velferð."

Kristján Möller samgönguráðherra segir það eitt helsta verkefni ríkistjórnarinnar á næstu vikum og mánuðum að ná jafnvægi í efnhagsmálum. Hann segir Íslendinga að fá til sín erfiðleika í efnhagsmálum heimsins. Það hafi kannski verið fyrirsjáanlegt að það myndi koma en hann taki undir með öðrum að samstarf flokkanna í ríkisstjórn hafi verið afar farsælt og gott og framtíðin lofi góðu.