Neytendasamtökin telja hækkun pakkaferða vafasama

Neytendasamtökin vekja á heimasíðu sinni athygli á réttarstöðu neytenda vegna hækkana á svokölluðum pakkaferðum sem ferðaskrifstofur selja. Segja samtökin að borið hafi á því undanfarnar vikur að einhverjar ferðaskrifstofur hafi hækkað verð á pakkaferðum og sent væntanlegum ferðalöngum bakreikning eftir að gengið hafi verið frá samningum um ferðina.

Taka Neytendasamtökin það fram í pistli á heimasíðunni að lög um alferðir kveði skýrt á um að verð sem sett er fram í samningum skuli haldast óbreytt nema tekið hafi verið fram í samningnum að það geti hækkað og tilgreint sé nákvæmlega hvernig breytt verð skuli reiknað út.