Ítalskur skiptinemi með 9,14 í einkunn

„Íslenska er mjög fallegt tungumál," segir Veronica Piazza, sautján ára ítalskur skiptinemi, sem nýlega fékk 10 í einkunn í íslenskuprófi fyrir erlenda nema í Fjölbrautaskólanum við Ármúla.

Meðaleinkunn Veronicu úr jólaprófunum er 9,14 og er árangur hennar enn glæsilegri sé litið til þess að hún kunni ekki stakt orð í íslensku þegar hún kom til landsins fyrir tæpum fjórum mánuðum á vegum AFS-samtakanna.

Fyrstu vikurnar talaði íslensk fósturfjölskylda Veronicu bæði íslensku og ensku við hana en svo var tekin ákvörðun um að á heimilinu yrði bara töluð íslenska. Það hefur hjálpað henni mikið við að ná tungumálinu. Hún segir íslensku vera allt öðruvísi en ítölsku og enn skilji hún ekki allt sem við hana er sagt.

Veronica kemur frá smábæ skammt frá Mílanó á Ítalíu. Hún segist hafa valið að koma til Íslands þar sem henni hafi þótt landið svo framandi. „Á Ítalíu er lítið talað um Ísland en margir spurðu mig af hverju ég færi ekki til Bandaríkjanna. Ég hef hins vegar alltaf haft áhuga á að kynnast Íslandi, landinu og menningunni," segir Veronica.

„Ítalir hafa þá hugmynd um íbúa Norðurlandanna að þeir séu svo kaldir í viðmóti. Að þeir tali ekkert og ég var svolítið hrædd um þetta þar sem ég er ekkert ofsalega opin í samskiptum. Ég held þó að ég hafi lært að til að kynnast fólki sé mikilvægt að taka fyrsta skrefið. Ég reyni því að kynnast fólki og þannig hef ég lært margt þessa mánuði sem ég hef búið á Íslandi," segir Veronica.

Henni finnst Íslendingar þó svolítið skrítnir. „Fyrst eru þeir feimnir en svo þegar maður kynnist þeim þá eru þeir svo hlýir og yndislegir. Í fyrstu var ég svolítið áttavillt þar sem á Ítalíu er venjan að faðma fólk og kyssa, jafnvel þótt þú þekkir það ekki. Ég komst þó fljótt að því að þannig eru Íslendingar ekki," segir Veronica og hlær.

„Mér líður vel á Íslandi. Ég bjóst ekki við að Íslendingar væru svona yndislegt fólk og ég er mjög ánægð hérna hjá íslensku fjölskyldunni minni. Svo hef ég eignast fullt af góðum vinum," segir Veronica sem ráðgerir að dvelja á Íslandi fram í júní á næsta ári.