Óvíst með 8% samdrátt í launakostnaði borgarinnar

Hanna Birna Kristjánsdóttir, verðandi borgarstjóri, segir að ekki hafi verið tekin afstaða til fjölmargra tillagna embættismanna Reykjavíkurborgar. Þar á meðal er tillaga um að draga saman launakostnað borgarinnar og minnka yfirvinnu borgarstarfsmanna.

Á blaðamannafundi F-listans í Ráðhúsinu í morgun vitnaði Ólafur F. Magnússon í minnisblað sem samið var á fjármálaskrifstofu borgarinnar. Þar er gert ráð fyrir því að launakostnaður borgarinnar verði dreginn saman um átta prósent og auk þess dregið verði úr yfirvinnu.

Hanna Birna sagði í kvöldréttum Ríkisútvarpsins að hún hafi ekki séð umrædda tillögu. ,,Ég hugsa að þetta eitt sé af fjölmörgum plöggum sem embættismenn borgarinnar hafa verið að leggja fram til umræðu og skoðunar vegna þeirra fjárhagsstöðu sem upp er komin í borginni og það hefur ekki nein afstaða tekin til neinna af þessum tillögum."

,,Það væri algjört ábyrgðarleysi af stóru sveitarfélagi eins og Reykjavík að ætla sér að fara í aðgerðir sem borgarstjóri nefnir þarna á þeim tímum sem nú blasir við. Það væri ekki að mínu viti að mæta því ástandi sem hér er," sagði Hanna í samtali við Rúv.

Ekki náðist í Hönnu Birnu í dag þrátt fyrir ítrekaðar tilraunir.