Djokovic fyrsti Serbinn til að vinna stórmót

Novak Djokovic varð í morgun fyrsti Serbinn til að vinna stórmót í tennis er hann fagnaði sigri á opna ástralska meistaramótinu í tennis.

Djokovic mætti Frakkanum Jo-Wilfried Tsonga sem kom mjög á óvart með því að komast alla leið í úrslitaviðureignina. Á leið sinni þangað lagði hann fjóra leikmenn sem eru á meðal fimmtán efstu á styrkleikalista Alþjóða tennissambandsins.

Tsonga sló út Rafael Nadal í undanúrslitum en Djokovic sá við Roger Federer í hinum undanúrslitaleiknum.

Leikurinn í morgun var mjög jafn og spennandi en eftir að Tsonga vann fyrstu lotuna gerði Djokovic fá mistök og kláraði viðureignina með mikilli baráttu.

Tsonga vann fyrstu lotuna 6-4 en Djokovic þær þrjár næstu 6-4, 6-3 og 7-6.

Þetta var í annað skiptið sem Djokovic keppir til úrslita á stórmóti en í fyrsta skipti hjá Tsonga.